வலுவிழந்த ஸ்நேகங்கள்

அத்தனை பிரயத்தனமான
திட்டங்கள்
வரையறைகள்
எச்சரிக்கைகள்
எல்லைகளுக்குள்
கவனமான கால் பதிவுகளுடன்
துவக்கியே ஆகவேண்டியிருக்கிறது
ஒரு ஸ்னேகத்திற்கான பயணத்தை

மதில்கள் சூழ்ந்த உனது
கோட்டை முகப்புகளில் காத்திருந்து
நீ அடைக்க முயற்சிக்காத
இடைவெளிகளில்
காற்றாய் புகுந்து
நிழலாய் உலவுகிறேன்
தடை செய்யப்பட்ட உனது
பிரதேசங்களுக்குள்
நீ ஆட்சேபிக்கத் தயங்கிய
அத்துமீறல்களுடணும்
கள்ளம் பதிந்த எட்டுக்களுடணும்
ஒரு திருடனாய் உள் நுழைகிறேன்
உனது கோட்டையின்
மர்ம அறைகளுக்குள்
வருகைகள் உணர்ந்தும்- எனது
பின் தொடரலை அனுமதிதவளாய்
புதிராய் புன்னகைத்து
ஓடி ஒளிகிறாய்
இருள் சூழ்ந்த உனது
ரகசிய பாதாளங்களுக்குள்
ஒரு பூனையாய் பதுங்கி
மீண்டும் மீண்டும் முன்னேறுகிறேன்
விடை தெரியாத உனது
ஸ்நேகங்களை நோக்கி

இறுதியில்
ஒரு பட்டாம்பூச்சியைப்போல்
அத்தனை லாவகமாய் மடக்கிப்
பிடிக்க வேண்டியிருக்கிறது
பாதாளத்தின் அந்தரங்க இடுக்குகளுக்குள்
ஒளிந்துகொண்டிருக்கும்
உனது ஸ்நேகங்களை

காதலின் ஒவ்வொரு நிலையாய்
உள் நுழைந்து
உயிர் புகுந்து
ஸ்நேகங்களை திறந்து பார்க்கும்
சூட்சுமாங்கள் நிறைந்த- இந்த
சாதுரிய சதுரங்கத்தில்
நாம் இருவருமே ஒருவரையொருவர்
ஜெயித்துக்கொள்கிறோம்- அல்லது
தோற்கடிக்கிறோம்

ஒவ்வொரு காய் நகர்வுகளிலும்
ஒவ்வொரு திறவுகளிலும்
ஒவ்வொரு அவிழ்ப்புகளிலும்
ஒவ்வொரு கண்டடைதல்களிலும்
இனம்புரியாத
ஒரு தரிசனத்தின் பரவசத்தில்
சுயம் இழக்கிறோம்

விழிகளின் ஆழத்தில் பதுங்கியிருக்கும்
அந்தரங்கங்களின் மீதான ஊடுருவல்கள்
அத்தனை சத்தியமாய் இருந்ததில்லை
நம் இருவருக்குமே- எனினும்
அறுபட்ட பார்வைகள் இட்டுச்செல்லும்
ஒரு மௌனத்தின் ஆழத்தில்
நிகழ்ந்து கொண்டிருக்கும்
பாசாங்குகள் களைந்த- நம்
மனதின் நிர்வாண உரசல்கள்

குறுகுறுப்புகளின் தடுமாற்றத்தில்
சிக்கி கரையேற முடியாமல்
மூழ்கிக் கரைந்து விடுகின்றன
நம் சந்திப்புகள்
தேங்கிவிடும் கேள்விகளிலும்
எஞ்சிவிடும் பதில்களிலும்
நீள்கிறது நம் ஸ்னேகத்தின் பயணம்
என்றாவது ஒருநாள் முழுமையடையாளம்
ஏதேனும் ஒரு சந்திப்பு
அங்கே காத்திருக்கிறது
நமக்கான மற்றுமொரு புறப்பாடு

புறப்பாட்டிற்கான போதிய
அவகாசங்கள் இருந்தபோதும்
இப்போதிருந்தே நிகழ்ததிக்கொண்டிருக்கிறோம்
நிச்சயமில்லாத அந்த
நீண்ட நெடும் பயணத்திற்கான
ஆயத்தங்களை
ஊடல்களும்
பிரிவுகளும்
கூடல்களும்
அதன் சாரமே

சொல்லப்படாத வார்த்தைகளால்
பகிர்ந்து கொள்கிறோம்
நம் சரித்திரங்களை
தீண்டப்படாத ஸ்பரிசங்களால்
தழுவிக்கொள்கிறோம்
மூச்சு முட்டும் நம்
அணைப்புகளை

இருளில் கரிய உருவங்களாய்
பதுங்கியிருந்த-நம்
ஸ்னேகத்தின் நிழல்கள்
குதூகலத்தின் எல்லை
மறந்த ஒரு கணத்தில்
அகப்பட்டுக்கொள்கின்றன
உடற் கூசும் வெளிச்சத்தின்
ராட்சத கண்களிடம்

வழக்குகள்
வஞ்சங்கள்
ஏற்றதாழ்வுகள்
மிரட்டல்கள்
நிர்பந்தங்களின்
சூழ்ச்சிகளில்
நம்மையுமறியாமல்- நமக்குள்
நிகழ்ந்துவிடுகின்றன
சில நகக்கீறல்கள்

காயங்களின் காந்தலில்
ஆராய முற்படுகிறோம்
துரோகங்கள்ளுக்கான
காரண காரியங்களை
பரஸ்பர பழிசுமத்ல்களுக்குபின்
மீண்டும் துளிர்க்கவே செய்கிறது
சூழ்ச்சிகளின் நகங்களால்
அத்தனை எளிதாய்
கிள்ளி ஏறியக்கூடிய
வலுவிழந்த நம் ஸ்நேகங்கள்

மீண்டும் மீண்டும் இணைய முயற்சித்து
கண்ணாடித் துண்டுகளாய்
சிதறிப்போன- நம்
ஸ்நேகங்களின் சில்லுகளிலிருந்து
நழுவிக்கொண்டிருக்கின்றன
உனது பிம்பங்கள்
நடுவே நான் மட்டும் நிற்கிறேன்
ரத்தம் கசியும் கால் தடங்களுடனும்
ஏமாற்றத்தின் ரணங்களுடனும்

சலனங்கள் வற்றி
உறைந்துவிட்ட உனது மௌனத்தில்
இன்னும் உறையாமல்
வழிந்து கொண்டிருக்கிறது
நம் ஸ்னேகத்தின் ஒரேயொரு
ரத்தக்கோடு

மீண்டும் ஒரு
இணைவுக்கான சாத்தியங்கள்
மடிந்து கொண்டிருக்கின்றன- என்றாலும்
வழிந்து கொண்டிருக்கும்
ரத்தக்கோடுகளையாவது
கழுவ முற்படலம்
எஞ்சி நிற்கும்- உனது
ஒரேயொரு பதிலால்!

எலியாஸ்

எலியஸை தேடிப்போகச் சொன்னார்கள்
அவசரமானதொரு பார்ஸல்
காத்திருந்தது அவனுக்கு
எலியஸை எனக்கு பரிச்சயமில்லை
முன்பின் பார்த்ததுமில்லை

அடையாளம் சொன்னார்கள்
மாநிரம்
சராசரிக்கு குறைவான உயரம்
தட்டை உருவம்
தழும்பு முகம்
அடர்ந்த மயிர்

சிக்கலான வரைபபடங்களுக்குள்
புகுந்து வளைந்து
செல்ல வேண்டியிருந்தது
எலியாஸை தேடி

ஒவ்வொரு திறவுகளுக்குப் பின்னும்
தன்னை பற்றிய
சந்தேகக் குறிப்புகளை மட்டும்
மிச்சம் வைத்துவிட்டு
மர்மமானதொரு கதவுக்குப் பின்ணிருந்து
புன்னகைத்துக்கொண்டிருக்கிறான்
எலியாஸ்

கணக்கிறது
அவனை சென்றடைய வேண்டிய
பார்ஸல்

எலியாஸ் இன்று எனது
அதீத உச்சரிப்புகளுக்கும்
விசாரிப்புகளுக்கும்
விரோதங்களுக்கும் உள்ளாகிறான்

சுடரின் வெப்பத்தில்
உருகி வழியும் மெழுகாய்
கரைந்து உறைந்து கொண்டிருக்கிறது
அவனது சித்திரம்

ஒரு கதவின் பாதுகாப்புக்குள்
பதுங்கியிருந்த எண்ணற்ற முகங்களில்
யாருக்கும் பொருந்தவில்லை
எலியாஸுக்காக நான்
உருவாக்கியிருந்த
தழும்பு முகம்

எலியாஸ் யாருமற்றவன் அல்ல
யாரோ ஒருவணுமல்ல
தான் பெயருக்குள் யாரையோ
புதைத்துக்கொண்டவன்

இறுதியில்
எலியாஸை தெரிந்த
எலியாஸ் அல்லாத
எலியாஸ் ஒருவனிடம்
ஒப்படைத்துவிட்டேன்
அவனது பர்ஸலை
அவனைப்பற்றிய விசாரணைகளை
விரோதங்களை
உச்சரிப்புகளை
அவனது பெயரை
மற்றும் இப்பிரபஞ்சத்தில்
எனக்கும் அவனுக்குமான
ஈரமற்ற ஒரு துளி தொடர்பையும்

திரும்புகையில்
எலியாஸைப் பற்றிய
அடையாளத் தகவல்களிலும்
மனச் சித்திரங்களிலும்
அவனது வயதைப் பற்றிய குறிப்பே
இல்லையென உணர்ந்தேன்

வேறொரு நாள்
காரியாலயத்தில் பேசிக்கொண்டிருந்தார்கள்
எலியாஸ்
இத்தனை குறைந்த வயதில்
விபத்தில் மாண்டிருக்க வேண்டாமென்று...!

பிரிவு நிகழும் கணம்

பிரிவு நிகழும் கணம்
அத்தனை நிதானமாக
அத்தனை துல்லியமாக
அத்தனை உக்கிரமாக நிகழ்வதில்லை
சினிமாவில் நிகழ்வது போல்

ஒத்திகை பார்த்த அசைவுகளை மீட்பதற்குள்
சேகரித்த வார்த்தைகளை திரட்டுவதற்குள்
முதல் வார்த்தையை பற்றி அடுத்த வார்த்தைக்குள் நுழைந்து
அசாதாரணமான வார்த்தை ஒன்றை வெளிப்படுத்துவதற்குள்
சட்டென்று ஒரு கண்ணீர் துளி எட்டிப்பார்ப்பதற்குள்
காலத்தில் உறையும் கணமாக மாற்றும்
மகத்துவம் ஒன்று நிகழ்வதற்குள்
பாசாங்குகளின் முகமூடி விலகுவதற்குள்

அத்தனை நாசூக்காக
அத்தனை எளிதாக
அத்தனை சம்பிரதாயமாக
அத்தனை கவனமாக நிகழ்ததிவிட்டோம்
பிரிவு நிகழும் கணத்தை

சொல்லுக்கு சொல்
புன்னகைக்கு புன்னகை
கை குலுக்கலுக்கு கை குலுக்கல் என
வழிபோக்கணுக்கு முகவரி சொல்வது போல்
நிகழ்ந்துவிட்டது
பிரிவு நிகழும் கணம்

சொல்லப்படாத வார்த்தைகளும்
சிந்தப்படாத கண்ணீரும்
இந்த தணித்த கோடையின் வெப்பத்தில்
உலர்ந்து ஆவியாகும்
பின்பொருநாள்...!

பராமரிக்க தெரியாதவனின் கனவுகள்

இழப்புகளின் ரணங்கள் ஆறிய ஒரு ஆசுவாசத்தில்
எனது பழைய கனவு ஒன்றை திறந்து
உள்ளே நுழைந்தபோது
என் கனவுகள் சிதறிக்கிடந்தன
துண்டுகளாய் துகள்களாய் சிதைந்திருந்தன
சில துண்டுகள் காலத்தின் வெப்பத்தில்
உருகிக் கரைந்திருந்தன
சிதறிய துகள்கள்
காற்றின் அந்தரங்கத்தில் புதைந்திருந்தன
எஞ்சியிருந்த சில துண்டுகளை என்னால்
அடையாளம் காணவே முடியவில்லை

வேறொருவரின் கனவுக்குள் வந்துவிட்ட தடுமாற்றங்களுடன்
விலகித் தயங்கி பின்னால் நகர்கையில்
எஞ்சியிருந்த எனது காலடி தடங்கள் நிச்சயப்படுத்தின
இவை என் கனவுதாநென்று

எனக்கு தெரியாமல் என் கனவுக்குள்
யார் யாரோ வந்து போயிருக்கிறார்கள்
என்னென்னவெல்லாமோ நிகழ்ந்திருக்கிறது
எனக்கு தெரிந்திருக்கவில்லை
கனவுகளை எப்படி பாராமரிப்பதென்று
எவருக்கேனும் தெரிந்திருக்குமா
என்பது கூடசந்தேகமே

சிதறியவற்றை கூட்டி அள்ளி சேகரித்தபோது
அவை பிடியிலிருந்து நழுவிக்கொண்டேயிருந்தன
ஒரு துண்டை மட்டும் எடுத்து
ஊதித் துடைத்து தூசி தட்டியபோது
தட்டி விடப்பட்டேன்
வேறொருவருக்குச் சொந்தமானது என்றார்கள்

பராமரிக்க தெரியாதவனின் கனவுகள்
தானாகவே ஊர்ந்து நகர்ந்து வேறொருவரிடம்
அடைக்கலம் தேடிக்கொள்கின்றன
ஆம் என் கனவு வேறொருவருக்கு
நனவாகியிருந்தது

என் கனவு என்னை விட்டு
வெகு தூரம் சென்றிருந்தது
எனக்குத் தெரிந்திருக்கவில்லை
அது எப்போதோ என்னை விட்டு
விலகி விட்டதென்று....!

அடையாளம் தெரியாத வார்த்தை

ஒவ்வொரு நீண்ட சந்திப்புகளுக்குப் பின்னும்

ஒவ்வொரு வழியனுப்பல்களுக்குப் பின்னும்

எஞ்சிவிடும் ஏதோ ஒரு வார்த்தையை

தவிர்க்க முடிவதேயில்லை - எப்பொழுதும்

விசேஷம் என்னவென்றால்

தொலைந்து போன வார்த்தையின் மீதான தேடலில்

ஆயிரக்கணக்கான புதிய வார்த்தைகள்

அகப்பட்டுக்கொள்வதுதான்....

கடைசிவரை தட்டுப்படுவதேயில்லை

எஞ்சிவிட்ட அந்த ஒரு வார்த்தை மட்டும்

அடையாளம் தெரியாத அந்த ஒரு வார்த்தைதான்

நமது தொடர்பை இன்னும் வெகு தூரத்திற்கு

அழைத்து சென்றுகொண்டிருக்கிறது

முடிவில்லாமல் நீளும்

இந்த தண்டவாளங்களைப்போல ......!